اسلام آباد۔14جون (اے پی پی) کابینہ دی اقتصادی رابطہ کمیٹی (ای سی سی) پاکستان ایل این جی لمیٹڈ کوں آذربائیجان دی سٹیٹ آئل کمپنی نال فریم ورک معاہدے دی موکل ݙے ݙتی، نجکاری کمیشن کوں ہیوی الیکٹریکل کمپلیکس دی نجکاری دا عمل ایں سال 30 جون تئیں پورا کرݨ دی وی ہدایت کیتی اے۔ اقتصادی رابطہ کمیٹی دا اجلاس بدھ کوں وزیر خزانہ سینیٹر محمد اسحاق ڈار دی صدارت اچ تھیا۔ اجلاس اچ وفاقی وزراء سید نوید قمر، خرم دستگیر خان، سید مرتضیٰ محمود، شاہد خاقان عباسی،وزیرمملکت ڈاکٹر عائشہ غوث پاشا، وزیر مملکت مصدق ملک، معاون خصوصی طارق باجوہ، وفاقی سیکرٹریز اتے ٻے سینئر حکام شریک تھیے۔ اجلاس اچ وزارت توانائی دی سمری تےپاکستان ایل این جی لمیٹڈ اتے آذربائیجان دی سٹیٹ آئل کمپنی وچال معاہدے دے فریم ورک دا جائزہ ڳھدا ڳیا۔ ای سی سی پاکستان ایل این جی لمیٹڈ کوں آذربائیجان دی سٹیٹ آئل کمپنی نال فریم ورک معاہدے دی موکل ݙے ݙتی، نجکاری کمیشن کوں ہیوی الیکٹریکل کمپلیکس دی نجکاری دا عمل ایں سال 30 جون تئیں پورا کرݨ دی وی ہدایت کیتی۔ اجلاس اچ چھی ایوی ایشن سکواڈرن دی مختلف لوڑھ کوں پورا کرݨ دی مد اچ کابینہ ڈویژن کیتے 404.76 ملین روپے دے تکنیکی ضمنی گرانٹ دی وی منظوری ݙتی۔ اجلاس اچ ہیوی الیکٹریکل کمپلیکس دے ملازماں کوں تنخواہیں ݙیوݨ دی مدد اچ وزارت صنعت و پیداوار، بینک آف خیبر کوں مارک اپ دی ادائیگی اتے آپریٹنگ خرچیاں کیتے 157.73 ملین روپے دے ودھیکی فنڈز دی وی منظوری ݙتی۔
